Тең мүмкіндіктер жолында: студентіміздің жарқын жетістігі

«Тұран-Астана» университеті «Ұлттық және халықаралық құқық» кафедрасының студенті Миташева Лейла (ЮП-24-2 тобы) Prometheus Volunteer Organization ұйымының Алғыс хатымен марапатталды.

Алғыс хатта оның ұйым қызметіне қосқан үлесі мен белсенді қатысуы, инклюзивті спортты дамытуға, оның ішінде паралимпиадалық қозғалысты қолдауға және ерлер мен әйелдерге арналған спорттық іс-шараларды ұйымдастыруға атсалысқаны ерекше атап өтілген. Сондай-ақ, оның жауапкершілігі мен жоғары ынта-жігері іс-шаралардың табысты өтуіне зор үлес қосқаны көрсетілген.

Лейланың қызметі Тұрақты даму мақсаттарының 10-мақсаты — «Теңсіздікті азайту» қағидаттарымен тікелей үндеседі, өйткені ол қоғамдағы тең мүмкіндіктерді қамтамасыз етуге және инклюзивті ортаны дамытуға бағытталған.

Біз студенттеріміздің осындай жетістіктерін, олардың белсенді азаматтық ұстанымы мен қоғамға пайдалы бастамаларын ерекше мақтан тұтамыз. Мұндай үлгілер жаңа буынның жауапты әрі көшбасшы тұлға ретінде қалыптасуына ықпал етеді.

Лейланы шын жүректен құттықтаймыз және алдағы уақытта да табыстар тілейміз!