Шыңдарды бағындыру: «Тұран-Астана» Университетінің студенттері мұзға өрмелеуден өткен чемпионаттың жүлдегерлері атанды
Мінездің беріктігі, спорттық шеберлік және жеңіске деген ұмтылыс – «Тұран-Астана» Университетінің студенттері мұзға өрмелеуден өткен беделді жарыста жүлделі орындарға ие болып, дайындықтарының жоғары деңгейін тағы бір мәрте дәлелдеді.
2026 жылғы 29 қазан мен 2 қараша аралығында Астана қаласында жасанды бедердегі «Мұзға өрмелеу» бағыты бойынша альпинизмнен Қазақстан Республикасының және Астана қаласының чемпионаттары өтті. Жарыс спортшылардың басын қосып, олардан тек физикалық күш пен төзімділікті ғана емес, сонымен қатар техникалық шеберлікті, қозғалыс дәлдігін, психологиялық тұрақтылықты және жоғары бәсекелестік жағдайында шешім қабылдау қабілетін талап етті.
Қатысушылар екі бағыт бойынша бақ сынасты: «Қиындық» және «Жылдамдық». Бұл бағыттардың әрқайсысы спортшылардың дайындығына ерекше талаптар қояды. Егер біріншісі техникалық тұрғыдан күрделі трассаны еңсеруді көздесе, екіншісі барынша жинақылықты, жылдам реакцияны және қозғалыстың мінсіз үйлесімділігін талап етеді.
Жарыс қорытындысы бойынша «Тұран-Астана» Университетінің өкілдері үш жүлделі орынды иеленіп, студент жастардың жоғары спорттық әлеуетін растады.
Қыздар арасында:
-Рамазан Даяна, УС-Т-25-2 тобының студенті, – «Қиындық» бағыты бойынша І орын.
-Қапсалямова Жаннұр, МН-Т-26-1 тобының магистранты, – «Жылдамдық» бағыты бойынша ІІІ орын.
Жігіттер арасында:
-Тұрсынбеков Фархат, УС-Т-25-2 тобының студенті, – «Жылдамдық» бағыты бойынша ІІ орын.
Осынау марапаттардың әрқайсысының артында айлар бойы төгілген маңдай тер, қажырлы жаттығулар, тәртіп, табандылық пен өз мүмкіндіктерінің шегінен шығуға деген дайындық тұр. Спортшыларымыздың жетістіктері – мақсатқа деген ұмтылыс пен жүйелі жұмыстың нақты нәтижеге қалай айналатынының жарқын үлгісі.
«Тұран-Астана» Университеті дене шынықтыру мен спортты білім беру және тәрбие үдерісінің маңызды құрамдас бөлігі ретінде қарастыра отырып, жастардың жан-жақты дамуына ерекше көңіл бөледі. Студенттердің спорттық жетістіктері университет беделін нығайтып қана қоймай, бүкіл студенттік қауымдастық үшін шабыттандыратын үлгі болып табылады.
Чемпиондарымыз бен жүлдегерлерімізді лайықты марапаттарымен құттықтаймыз! Оларға жаңа спорттық шыңдар, өз күштеріне деген сенімділік және республикалық пен халықаралық ареналарда жарқын жеңістер тілейміз!
