Цифрлық трансформация: «Тұран-Астана» университетінде жасанды интеллект бойынша қысқы мектеп басталды
Мемлекет басшысы Қасым-Жомарт Тоқаев жасанды интеллектіні дамыту алдағы онжылдықта ұлттардың бәсекеге қабілеттілігін айқындайтын шешуші фактор болатынын бірнеше рет атап өткен болатын. Қазақстанда 2026 жылдың Жасанды интеллект жылы болып жариялануы академиялық қауымдастық алдына жаңа құралдарды игеріп қана қоймай, білім беру ортасын түбегейлі трансформациялау міндетін қойып отыр. «Тұран-Астана» университеті озық технологияларды күнделікті тәжірибеге енгізе отырып, осы ұлттық стратегияны іске асыруға белсенді түрде қатысуда.
Университет 12-14 қаңтар аралығында жасанды интеллектіні оқу процесіне интеграциялауға бағытталған практикалық сессиялар сериясын ұйымдастырды. Бағдарламаның басты оқиғасы — алдыңғы қатарлы цифрлық технологияларды жүйелі меңгеруге арналған «Ғылым мен білімдегі жасанды интеллект» атты практикалық тренинг болды.
Оқыту бағдарламасы іргелі негіздерден бастап оқу процесіне қолданбалы енгізуге дейінгі мәселелердің кең ауқымын қамтиды. Тренд-талдау және білім беруде жасанды интеллектіні пайдалану бойынша кіріспе курсты Computer Science саласындағы PhD докторы дәрежесіне үміткер, EPAM Solution жаһандық IT-компаниясының аға маманы Д.Е. Нам жүргізуде. Академиялық орта мен халықаралық технологиялық сектордың түйіскен жерінде жұмыс істей отырып, спикер қатысушыларға жаһандық IT-трендтердің классикалық оқыту әдістемелерін қалай өзгертетінін зерделеуге көмектеседі.
Теориялық базаның қисынды жалғасы ретінде Бизнес және цифрлық технологиялар (БЦТЖМ) және Құқық және гуманитарлық ғылымдар (ҚГҒЖМ) жоғары мектептерінің оқытушылары үшін нейрожелілерді практикалық қолдануға арналған қарқынды сессиялар өткізілді. Цифрлық трансформация департаментінің директоры А.С. Конев бастаған және департаменттің жетекші веб-бағдарламашылары Е. Бақытжанұлы мен С. Бердімұраттан тұратын тренерлер тобы автоматтандырудың нақты құралдары мен оқу контентін генерациялаудың заманауи мүмкіндіктерін көрсетуде.
Мұндай кешенді тәсіл университет оқытушыларына технологиялардың соңынан ілесіп қана қоймай, оларды күнделікті педагогикалық тәжірибеге белсенді енгізуге, осылайша білім беру процесінің сапасын заман талабына сай арттыруға мүмкіндік береді.
Қатысушыларға нәтижелі жұмыс және жаңа технологияларды табысты меңгеруді тілейміз!