IT-білім берудің жаңа көкжиектері: «Тұран-Астана» Университетінде Касперский Академиясы ашылды
Бүгін «Тұран-Астана» Университетінде жоғары білікті IT-мамандарын даярлауда сапалы жаңа перспективаларды айшықтайтын маңызды оқиға -Касперский Академиясының ресми ашылуы өтті.
Бұл инновациялық алаңды құру академикалық оқытуды киберқауіпсіздік индустриясының озық технологияларымен интеграциялаудың маңызды кезеңіне айналды. Жаңа Академия студенттерге деректерді қорғаудың практикалық дағдыларын меңгеруге, өзекті киберқауіптерді зерттеуге және әлемдік деңгейдегі бағдарламалық шешімдермен жұмыс істеуге мүмкіндік береді.
Салтанатты ашылу рәсімін «Тұран-Астана» Университетінің Бірінші проректоры, педагогика ғылымдарының докторы, профессор Айтжан Абдыров пен Kaspersky компаниясының Қазақстан, Орталық Азия және Моңғолиядағы мемлекеттік органдармен жұмыс жөніндегі басшысы Әсет Ордабаев басқарды.
Бұл іс-шараға Университет басшылығы мен IT-индустрия өкілдерінің қатысуы аталған серіктестіктің жоғары практикалық маңыздылығын айшықтады.
Құттықтау сөзінде Университеттің бірінші проректоры, профессор Айтжан Абдыров бұл оқиғаның стратегиялық маңызын атап өтті. Ол бұл инновациялық алаңның ашылуы Мемлекет басшысының Қазақстанды ауқымды цифрлық трансформациялау, технологиялық суверенитетті нығайту және отандық IT-кадрлардың қуатты пулын қалыптастыру бойынша қойған басым міндеттеріне тікелей жауап беретінін тілге тиек етті: «Цифрландыру және жасанды интеллект жылы шеңберінде біздің университет озық білім беру экожүйесін құруға маңызды практикалық қадам жасап отыр. Біз TAU студенттеріне киберқауіпсіздіктің қатаң әлемдік стандарттарына толық сай келетін білім мен қолданбалы дағдыларды алуға барлық жағдай жасауға ұмтыламыз», - деп түйіндеді спикер.
Өз кезегінде Әсет Ордабаев оқу орнының басшылығына бастамашылдығы мен білім беру процесіне деген алысты болжайтын көзқарасы үшін терең алғысын білдірді: ««Тұран-Астана» Университетінің басшылығына студенттерге ең заманауи, қолданбалы дағдыларды беруге деген ұмтылысы үшін шынайы алғысымызды білдіреміз. Бүгінде киберқауіпсіздік - бұл цифрлық мемлекет пен бизнестің орнықты дамуының іргетасы. Мұндай Академия құру болашақ мамандарға оқу барысында-ақ шынайы кейстермен жұмыс істеуге, озық қорғаныс шешімдерін меңгеруге және Қазақстан мен бүкіл өңір нарығында сұранысқа ие кәсіби маман болуға мүмкіндік береді».
Жаңа қуаттардың оқу процесіне интеграциялануы мен оның технологиялық құрамдас бөлігі туралы Цифрландыру және жасанды интеллект жөніндегі проректор Анатолий Конев егжей-тегжейлі айтып берді. Ол ақпараттық қауіпсіздік пен заманауи интеллектуалды жүйелердің синергиясына басымдық берді: «Жасанды интеллект пен цифрлық экожүйелердің дамуы киберқауіпсіздіктің жоғары деңгейін талап етеді. Касперский Академиясы студенттерімізге озық бағдарламалық қамтамасыз ету мен практикалық аналитикаға қол жеткізуге мүмкіндік береді. Бұл бізге дайын IT-шешімдерді қолданып қана қоймай, сонымен бірге күрделі жүйелердің сенімді қауіпсіздігін қамтамасыз ете алатын мамандарды даярлауға жол ашады».
Салтанатты бөлім мен лента қию рәсімінен кейін қонақтар жаңа білім беру алаңының техникалық жабдықталуымен егжей-тегжейлі танысты. Аудиториялар заманауи бағдарламалық-аппараттық кешенмен және мамандандырылған софтпен жабдықталған. Бұл база тұрақты негізде практикалық сабақтар, ғылыми-зерттеу жобалары мен индустрияның жетекші сарапшыларынан шеберлік сыныптарын өткізуге мүмкіндік береді.
TAU-да Касперский Академиясының ашылуы - бұл университет инфрақұрылымын жаңғыртудағы ең маңызды қадам, ол студенттерге цифрлық білім берудің халықаралық стандарттары мен болашақтың озық технологияларына тікелей қол жеткізуді қамтамасыз етеді.
