«Тұран-Астана» университетінде 3 - 4 курс студенттеріне арналған бос жұмыс орындары жәрмеңкесі өтті
Өткен жұмада «Тұран-Астана» университеті болашақ түлектер мен еліміздің жетекші жұмыс берушілері арасындағы сұхбат алаңына айналды. Студенттерді жұмысқа орналастыруға және олардың кәсіби бағдар алуына бағытталған бұл шара бір арнада 20-ға жуық ұйымның басын қосты. Қатысушылар қатарында мемлекеттік мекемелер де, ұлттық компаниялар да, сондай-ақ жеке бизнес пен қоғамдық қорлар да ұсынылды.
Бір алаңда Мемлекеттік қызмет істері агенттігі мен Сот әкімшілігінің елордалық департаменттері сияқты мемлекеттік құрылымдар және «Қазақтелеком» АҚ секілді ірі корпорациялардың өкілдері бас қосты. Өз кезегінде, Тексеру комиссиясы мен Еңбек мобильділігі орталығы өкілдерінің белсенді қатысуы елорданың басқару секторында білікті мамандарға деген сұраныстың жоғары екенін айқындады.
Жәрмеңке барысында ұйым өкілдері өзекті бос жұмыс орындары мен тағылымдама бағдарламаларын таныстырса, студенттер алғашқы сұхбаттан өтіп, жас мамандарға қойылатын талаптарды талқылауға мүмкіндік алды. Пікірталас кезінде сұранысқа ие құзыреттіліктерге ерекше назар аударылды: жұмыс берушілер практикалық дағдылардың, бастамашылдық пен үздіксіз дамуға дайын болудың маңыздылығын атап өтті. Шақырылған серіктестер қатарында «Әскерилендірілген теміржол күзеті» ЖШС, «Centras Brands» ЖШС, «JOLTAP» жобасы, «Respublica» партиясының жастар қанаты, «Астана жастары» ЖРО және «Megakids Momyshuly» ЖШС, «Korkem 2011» ЖШС мен «БМБ Инженерлік орталығы» РМК секілді басқа да бірқатар ірі кәсіпорындар болды.
Мұндай іс-шаралар Университетіміздің экономиканың нақты секторымен серіктестік байланыстарын нығайтуға ықпал етеді және білім алушылардың практикаға бағытталған дайындық деңгейін арттырады. Көптеген жоғары курс студенттері үшін бұл жәрмеңке таңдаған мамандығы бойынша табысты мансап жолын бастаудың алғашқы қадамына айналды.
«Тұран-Астана» университеті өз түлектерінің заманауи еңбек нарығында нық позицияға ие болуын қамтамасыз ете отырып, өзара іс-қимылдың осындай форматтарын алдағы уақытта да дамытуды көздейді.
